NASA Oy orbitasida kosmik stansiya qurish rejasidan voz kechib, e’tiborni to‘liq Oy yuzasida doimiy baza barpo etishga qaratmoqda. Kelgusi yetti yil ichida ushbu loyiha uchun 20 milliard dollar ajratilishi rejalashtirilgan. Bu haqda agentlik rahbari Jared Isaacman nutqiga tayanib, Al Jazeera xabar berdi.
Washington, D.C.da Artemis program doirasidagi hamkorlar, pudratchilar va hukumat vakillari ishtirokida uchrashuv o‘tkazildi. Unda NASA Oyga robotlashtirilgan missiyalar sonini ko‘paytirishini e’lon qildi. Shuningdek, Oy yuzasida yadroviy energiyadan foydalanish uchun sharoit yaratish rejalari ham ma’lum qilindi.
Ma’lum qilinishicha, Donald Trump tomonidan tayinlangan va dekabr oyida lavozimga kirishgan Isaacman ushbu o‘zgarishlar uzoq muddatli “Oydan Marsga” strategiyasini qayta ko‘rib chiqishning bir qismi ekanini ta’kidladi.
Yangilangan rejaga ko‘ra, Oyga yuboriladigan robotlashtirilgan missiyalar keskin oshiriladi. Ular hududni o‘rganish, texnologiyalarni sinovdan o‘tkazish hamda kelajakdagi infratuzilma qurilishi uchun zamin yaratadi. Asosiy maqsad — insonning Oyda uzoq muddatli mavjudligini ta’minlaydigan baza barpo etish.
Shu bilan birga, NASA 2028-yil oxirigacha Space Reactor 1 Freedom kosmik kemasini uchirishni rejalashtirmoqda. Missiya doirasida ochiq koinotda, Mars yo‘nalishida yadroviy elektr dvigatel texnologiyasi sinovdan o‘tkaziladi.
Mazkur kema Marsga yangi avlod vertolyotlarini yetkazib beradi. Ular 2021-yilda Perseverance bilan birga uchirilgan Ingenuity kabi ishlashi kutilmoqda.
Ma’lumot uchun, Artemis program 2017-yilda Donald Trumpning birinchi prezidentlik davrida boshlangan. Ushbu dastur 1972-yilda yakunlangan Apollo programdan so‘ng insoniyatni Oyga qaytarish va u yerda muntazam parvozlarni yo‘lga qo‘yishga qaratilgan eng yirik loyihalardan biri hisoblanadi.