2026/27-o‘quv yilida O‘zbekistondagi oliy ta’lim muassasalari talabalari uchun jami 776 ta prezident va nomli davlat stipendiyasi ajratiladi. Bu haqdagi kvotalar Oliy ta’lim, fan va innovatsiyalar vazirligining tegishli xati bilan tasdiqlandi.
Ma’lum qilinishicha, stipendiyalar respublika bo‘yicha yuqori bosqichlarda tahsil olayotgan 335 ming 471 nafar talaba orasidan o‘qishdagi yuqori natijalari, ilmiy izlanishlari hamda jamoatchilik faoliyati bilan ajralib turgan eng munosib nomzodlarga beriladi.
Yangi o‘quv yili uchun stipendiyalar quyidagicha taqsimlangan:
- Prezident stipendiyasi — 187 ta;
- Islom Karimov stipendiyasi — 194 ta;
- Navoiy stipendiyasi — 175 ta;
- Bobur stipendiyasi — 51 ta;
- Imom al-Buxoriy stipendiyasi — 44 ta;
- Beruniy stipendiyasi — 38 ta;
- Ibn Sino stipendiyasi — 33 ta;
- Abdulla Avloniy stipendiyasi — 16 ta;
- Ulug‘bek stipendiyasi — 13 ta;
- To‘lepbergen Qaipbergenov stipendiyasi — 11 ta;
- Ibroyim Yusupov stipendiyasi — 11 ta;
- Pahlavon Mahmud stipendiyasi — 3 ta.
Shu tariqa, davlat stipendiyalariga talabgorlar ulushi umumiy talabalar sonining qariyb 0,23 foizini tashkil etadi. Boshqacha aytganda, har ming talabadan ikki nafardan sal ko‘prog‘i ushbu nufuzli stipendiyalarga sazovor bo‘lish imkoniyatiga ega bo‘ladi.
Yana bir muhim yangilik shundaki, 2026/27-o‘quv yilidan boshlab nomli davlat stipendiyalariga nomzodlarning bilim va ko‘nikmalari qo‘shimcha ravishda maxsus test sinovlari orqali ham baholanadi. Yangi tartibga ko‘ra, talabgorlarning axborot texnologiyalari, O‘zbekiston tarixi va xorijiy tillar bo‘yicha bilimlari Bilim va malakalarni baholash agentligi tomonidan hududlar kesimida o‘tkaziladigan testlar orqali aniqlanadi.
Mutaxassislar fikricha, yangi tizim stipendiya sovrindorlarini saralashda shaffoflikni oshirish va talabalar bilimini yagona mezon asosida baholashga xizmat qilishi kutilmoqda.