O‘zbekiston Tashqi ishlar vazirligi AQSH va Eron o‘rtasida urushni tugatish hamda keskinlikni kamaytirishga qaratilgan o‘zaro anglashuv memorandumi imzolanganini olqishladi.
TIV bayonotida ushbu hujjat hozirgi murakkab xalqaro vaziyatda keskinlikni yumshatish, mintaqaviy xavfsizlik va barqarorlikni tiklash yo‘lidagi muhim diplomatik yutuq ekani ta’kidlandi.
“AQSH va Eron rahbariyatining hal qiluvchi pallada namoyon etgan siyosiy irodasi va uzoqni ko‘ra bilishini alohida e’tirof etamiz. Erishilgan kelishuv xalqaro hamjamiyat uzoq vaqtdan buyon kutgan tinchlik yo‘lidagi barqaror yechim uchun mustahkam zamin yaratadi”, — deyiladi vazirlik bayonotida.
Shuningdek, O‘zbekiston ushbu kelishuvga erishish uchun zarur sharoitlarni shakllantirishga hissa qo‘shgan Pokiston va Qatar, shuningdek Turkiya, Saudiya Arabistoni, Misr hamda boshqa mintaqaviy hamkorlarning sa’y-harakatlarini yuqori baholadi.
TIV muzokaralarning keyingi bosqichlari konstruktiv ruhda davom etishi va erishilgan kelishuvlar amalda samarali ro‘yobga chiqarilishiga umid bildirdi.
“Nizo va qarama-qarshiliklarni xalqaro huquq tamoyillari, o‘zaro hurmat va barcha tomonlar manfaatlarini inobatga olgan holda diplomatik vositalar orqali hal etish tinchlik va xavfsizlikni ta’minlashning asosiy sharti bo‘lib qolishiga ishonamiz”, — deyiladi bayonotda.
Ma’lumot uchun, memorandumni AQSH prezidenti Donald Trump G7 sammiti doirasida imzolagan. Eron tomonidan hujjatga Masoud Pezeshkian imzo chekkan. 14 banddan iborat memorandumga ko‘ra, Eron yadro quroliga ega bo‘lmaslik majburiyatini oladi. Tomonlar yakuniy bitimni 60 kun ichida ishlab chiqishi kutilmoqda.