O‘zbekistonda 2026–2027-yillarda har bir hududda o‘rta bo‘g‘in mutaxassislarini tayyorlaydigan 14 ta “yashil” texnikum faoliyati yo‘lga qo‘yiladi. Bu haqda “Ekomadaniyat” umummilliy loyihasi doirasida qabul qilingan prezident qarorida belgilandi.
Ekologik ta’limga urg‘u kuchayadi
Yangi texnikumlarda hududlarning ekologik, ijtimoiy va iqtisodiy xususiyatlaridan kelib chiqib kadrlar tayyorlanadi. Asosiy yo‘nalishlar — ekologiya, atrof-muhitni muhofaza qilish va iqlim o‘zgarishi bilan bog‘liq sohalar bo‘ladi.
Rejalarga ko‘ra:
- 2026–2028-yillarda ushbu yo‘nalishlarda ilmiy darajaga ega mutaxassislar soni 150 nafargacha yetkaziladi;
- 2030-yilgacha “yashil” texnikumlar orqali 10 ming nafar o‘rta bo‘g‘in kadrlar tayyorlanadi.
Green University bilan uzviy tizim
Texnikumlar Markaziy Osiyo atrof-muhit va iqlim o‘zgarishini o‘rganish universiteti — Green University bilan biriktiriladi va Kasbiy ta’lim agentligi bilan hamkorlikda ishlaydi.
2026/2027-o‘quv yilidan boshlab:
- ta’lim dasturlari universitet tomonidan ishlab chiqiladi;
- majburiy va tanlov fanlari universitet tomonidan belgilanadi;
- universitetning 1-bosqich fanlari texnikumlarning 2-bosqichiga kiritiladi.
Bitiruvchilar uchun imkoniyatlar
“Yashil” texnikumni muvaffaqiyatli tugatgan va ingliz tilidan kamida B2 darajaga ega bo‘lgan bitiruvchilar:
- GPA natijalariga qarab universitetning 2-bosqichidan o‘qishni davom ettirishi mumkin bo‘ladi.
Ekostipendiya joriy etiladi
Texnikumlarda iqtidorli o‘quvchilarni qo‘llab-quvvatlash maqsadida ekostipendiya ta’sis etiladi. Har yili 10 nafargacha o‘quvchiga:
- kamida 1 mln 271 ming so‘m miqdorida stipendiya beriladi.
Mazkur tashabbus haqida Shavkat Mirziyoyev 23-mart kuni ekologiya va iqlim sohasidagi ustuvor loyihalar taqdimoti davomida ma’lum qilgan edi.
Mutaxassislar fikricha, ushbu tizim ekologik ta’limni yangi bosqichga olib chiqib, bozor talabiga mos kadrlar tayyorlashga xizmat qiladi.